धनगढी – धनगढीको कैलाली मोडेलमा अध्ययनरत बाजुराका सुनिल बुढा (कछुवा) १५ वर्षको उमेरमै खण्डकाव्य प्रकाशन गरेर त्यसबाट आएको सम्पूर्ण रकमले सामाजिक कार्य गर्दै आइरहेका छन्। यस अघि पनि उनले सुदूरपश्चिमका लगभग ४ जिल्लाका ग्रामीण क्षेत्रका बालबालिकाका लागि शैक्षिक सामग्रीहरु वितरण गरिसकेका छन्।
भर्खरै ‘दिनेश शर्मा स्मृति नवसर्जक पुरस्कार-२०८१’ बाट सम्मानित भएका सुनिल बुढा (कछुवा) ले स्मृति पुरस्कारमा पाएको रकम र सुदूरपश्चिम होस्टेलको सहकार्यमा कैलालीको अत्तरियामा रहेको ‘श्री महिला तथा बालबालिका सेफ हाउस’ मा आज शिवरात्रीको अवसर पारेर केही थान लत्ताकपडा, फलफूल साथसाथै महिलाका लागि महिनावारीमा आवश्यक पर्ने सेनिटरी प्याड सहयोग गरेका छन्। यस अघि पनि उनले सुदूरपश्चिम होस्टेलको सहकार्यमा डोटीमा पनि लत्ताकपडा वितरण गरेका थिए। यस कार्यमा उनी संगै कैलाली मोडेल कलेजमा पढ्ने अनिल अवस्थी र तुलाराम ढाँटले सघाएका थिए।
सेफ हाउसमा बुढाको टिमले त्यहाँका बालबालिका संग अन्तरक्रिया पनि गरेका थिए। सेफ हाउसका बालबालिकाले नाचगान गरेर रमाइलो पनि गरेका थिए।
बुढाद्वारा लिखित ‘सहर जाने बाटो’ खण्डकाव्य त्यहाँका बालबालिकाका लागि उपहारस्वरूप पनि दिएका थिए। ३८ जना बालबालिका रहेको सेफ हाउसमा शिवरात्रीको अवसर पारेर बुढाको टिम र सुदूरपश्चिम होस्टेलको न्यानो सहयोग पाएर त्यहाँका बालबालिकाले पनि खुशी व्यक्त गरेका छन्।
