एजेन्सी : संयुक्त राष्ट्रसङ्घले युक्रेनी भूभागबाट रुस तत्काल फिर्ता गर्न समर्थन गर्ने प्रस्ताव पारित गरेको छ ।
यो प्रस्तावको पक्षमा ९३ र विपक्षमा १८ मत परेको थियो । ६५ देशले मतदानमा भाग लिएनन् । अमेरिकाले रुस र युक्रेनबीच युद्ध शुरू भएयता पहिलो पटक युक्रेनको विपक्षमा मतदान गरेको बीबीसीले जनाएको छ ।
प्रस्तावलाई समर्थन गर्नेहरूमा जर्मनी, बेलायत र फ्रान्स जस्ता प्रमुख युरोपेली देशहरू छन् । तर रुससहित अमेरिका, इजरायल र हङ्गेरीले यो प्रस्तावको विपक्षमा मतदान गरेका थिए ।
भारत र चीनले संयुक्त राष्ट्र सङ्घमा यो प्रस्तावमा मतदानमा भाग लिएनन् । युक्रेनसँग रुसको युद्धको तेस्रो वर्षगाँठमा यो प्रस्ताव आएको हो ।
यसैबीच फ्रान्सेली राष्ट्रपति इम्यानुएल म्याक्रोंले शान्ति स्थापनाको नाममा युक्रेनले आत्मसमर्पण गर्ने अवस्था हुन नहुने बताएका छन् ।
ह्वाइट हाउसमा अमेरिकी राष्ट्रपति डोनाल्ड ट्रम्पसँगको संयुक्त पत्रकार सम्मेलनमा म्याक्रोंले युक्रेनलाई आत्मसमर्पण गर्न लगाउने पक्षमा उभिन नसकिने बताएका हुन् ।
ट्रम्पले भन रुस र युक्रेनबीच शान्ति स्थापनाका लागि अमेरिकासँगै युरोपेली देशले पनि पहल गर्नुपर्ने बताएका छन् । जवाफमा म्याक्रोंले युरोप युक्रेनलाई सहयोग गर्ने जिम्मेवारीबाट पछि नहटेको जिकिर गरेका छ ।
