ताप्लेजुङ :प्रसिद्ध धार्मिकस्थल पाथीभरामा साउनदेखि पुस मसान्तसम्मको अवधिमा दर्शनार्थीबाट रु.एक करोड ३० लाख २४ हजार ४५६ भेटी संकलन भएको छ।
पाथीभरा क्षेत्र विकास समितिका अनुसार सोही अवधिमा एक लाख ६ हजार ६२३ जना भक्तजनले मन्दिरको दर्शन गरेका छन्। समितिले चालू आर्थिक वर्षको ६ महिनाको भेटी तथा दर्शनार्थीको सङ्ख्या सार्वजनिक गरेको छ।
पाथीभरा क्षेत्र धार्मिक आस्थाको केन्द्र भएकाले हरेक वर्ष लाखौँ भक्तजन यहाँ पुग्ने गर्छन्। भेटी र दानबाट संकलित रकम पाथीभराको संरक्षण, संवर्धन तथा दर्शनार्थीलाई थप सुविधा उपलब्ध गराउने, पूर्वाधार निर्माणलगायतका काममा खर्च हुँदै आएको पाथीभरा क्षेत्र विकास समितिका कार्यकारी निर्देशक प्रजिन हाङबाङले बताए।
पाथीभरा धाम नेपालका प्रमुख शक्तिपीठमध्ये पूर्वकै एक प्रसिद्ध तीर्थस्थल हो। पाथीभरामा विशेषगरी बडा दशैँ, तिहार, चैते दशैँ र अन्य चाडपर्वका बेला भक्तजनको उल्लेख्य उपस्थिति हुने गर्छ। पाथीभरा देवीको दर्शनले मनोकांक्षा पूरा हुने जनविश्वास छ। दर्शनार्थीको बढ्दो चापलाई व्यवस्थित गर्न समितिले नयाँ संरचना र सेवा सुधारका योजना क्रमशः सञ्चालन गरिरहेको छ।
पाथीभरा क्षेत्रमा खानेपानी, पदमार्गमा शौचालय व्यवस्थापन, विभिन्न गाउँबाट पाथीभरा जाने पदमार्ग निर्माण, पूजास्थलका साथै मन्दिर परिसर व्यवस्थापन, मन्दिर परिसरमा वृक्षरोपण, पर्यटक प्रहरीचौकी स्थापना, पार्किङस्थल निर्माणलगायतका काम गर्दै आएको समितिले जनाएको छ।
