काठमाडौं :सुनसरीमा राखिएका शंकास्पद बस्तु नेपाली सेनाले निष्क्रिय बनाएको छ।
ईटहरी उपमहानगरपालिका– ६ स्थित उपमहानगरपालिका कार्यालय अगाडिको पसल छेउ यस्तै सुनसरी र मोरङ जोड्ने बुढीखोला पुलनजिक अर्को शंकास्पद वस्तु भेटिएको थियो।
तर, भेटिएका दुई शंकास्पद वस्तु बम भने नरहेको जिल्ला प्रहरी कार्यलय सुनसरीका प्रमुख सुमनकुमार तिम्सिनाले जानकारी दिए। उपमहानगर अगाडि भेटिएको शंकास्पद वस्तुलाई तिम्सिनाले होक्स रहेको बताए।
उपमहानगरअगाडि होक्स भेटिँदा बुढीखोलाको पुल छेउमा भने प्लास्टिकभित्र केही फोहोर मात्र भेटिएको प्रहरीले बताएको छ। उपमहानगरपालिकाको गेटअगाडि भेटिएको शंकास्पद वस्तुसँगै केही पर्चा प्रहरीले भेटेको छ।
राष्ट्रिय सुरक्षा दल नामको लेटरप्याडमा विभिन्न मागहरू राखिएका छन्। प्रहरीले बरामद गरेको पर्चामा संवैधानिक राजतन्त्र, प्रत्यक्ष निर्वाचित कार्यकारी, वैदिक सनातन हिन्दु राष्ट्र, संघीयता खारेजी, बलियो स्थानीय तहलगायतका माग गरिएका छन्। आफ्ना मागहरूलाई सरकारले ४० दिनभित्र पूरा गर्न चेतावनी समेत दिएको छ।
यता प्रहरीले भने आतंक फैलाउनेहरू पहिचानको क्रममा रहेको जनाएको छ।
