काठमाडौं :नेकपा एकीकृत समाजवादीको स्थायी कमिटी बैठक बुधबार बस्दैछ।
बैठक केन्द्रीय कार्यालय आलोकनगरमा बिहान साढे ११ बजे शुरु हुनेछ। पार्टीको देशभर साङ्गठनिक गतिविधि, जिल्ला तथा प्रदेशका अधिवेशन, मुलुकको समसामयिक राजनीतिक विषयवस्तु, नेताहरूको कार्यविभाजन तथा संरचनामा फेरबदलसम्बन्धी निर्णय लिन बैठक बोलाएको उपाध्यक्ष प्रकाश ज्वालाले जानकारी दिए।
गत असारमा दशौँ राष्ट्रिय महाधिवेशन सम्पन्न गरेको पार्टीले अहिलेसम्म नेताहरूको जिम्मेवारी हेरफेर तथा कार्यविभाजनअन्तर्गत विभिन्न विभागीय प्रमुख, जिल्ला इन्चार्ज, आयोग तथा जनसङ्गठन इन्चार्ज तोकेको छैन । पार्टी संरचनामा कार्यविभाजन गर्न पार्टी अध्यक्ष माधवकुमार नेपालको नेतृत्वमा गठित कार्यदलले टुङ्गो लगाएको नामावली बैठकले अनुमोदन गर्ने उनले बताए।
कार्यदलमा रहेका अध्यक्ष नेपाल र सम्मानित नेता झलनाथ खनाल विदेश भ्रमणलगायतमा व्यस्त हुँदा कार्यविभाजनमा ढिलाइ भएको ज्वालाले बताए।
बैठक बिहीबारसम्म चल्नेछ।
