काठमाडौं – रास्वपा सांसद हरि ढकालले बोल्ने क्रममा अपुतालीको धनको कुरा ल्याएपछि एमाले सांसदले नियमापत्ति गरेकी छिन् ।
आइतबार बसेको प्रतिनिधिसभा बैठकमा सांसद ढकालले आफूहरूलाई नाति भनेकोमा प्रधानमन्त्री केपी शर्मा ओलीप्रति कटाक्ष गरेका थिए ।
‘डिट्ठा साहेबहरू र काजीसाहेबहरूका गलत रवैयालाई रोक्नका लागि आएका हामी अब्बल नातिनातिना हौं, ती नाति होइनौं जो मनको छोरालाई भनेको जति अपुताली धन खुवाइएर पुल्पुलिएका नातिनातिना होइनौं,’ ढकालले भने
त्यसलगत्तै एमाले सांसद दीपा शर्माले संसद्मा अमर्यादित शब्द बोलिएको भन्दै रेकर्डबाट हटाउन माग गरिन् । ‘सम्मानित सदनमा बोलिने अभिव्यक्ति आवेशमा आएर उत्तेजनामा आएर त्यसरी भन्न मिल्दैन । अपुताली भन्ने शब्द के भन्न खोजिएको हो रु कसलाई भन्न खोजिइएको हो । यो रेकर्डबाट हटाउन माग गर्दछु,’ शर्माले भनिन् ।
साउन ६ गते प्रतिनिधिसभामा विश्वासको मत लिने क्रममा प्रधानमन्त्री ओलीले संविधान जोगाउने जिम्मा कांग्रेस एमालेको भन्दै नाति पुस्ताका सांसदले चिन्ता गर्नुनपर्ने बताएका थिए ।
ढकालले आकस्मिक समय लिएर अन्य विषय बोलेको भन्दै सभामुख देवराज घिमिरेले पनि हस्तक्षेप गरेका थिए ।
