धनगढीःनेपाल विद्युत प्राधिकरण धनगढी विद्युत वितरण केन्द्र अन्तर्गत कुल ८३ हजार ९५३ विद्युत ग्राहक छन्।
सर्वसाधारण उपभोक्ताले समयमै विद्युतको बिल तिर्ने गरेको भए पनि सरकारी निकाय र विभिन्न संघसंस्थाले भने समयमा बिल तिर्ने गरेका छैनन्। प्राधिकरणले समयमा महसुल नबुझाउने ग्राहकको लाइन काट्ने गरेको छ। तर जिल्ला कारागार कैलाली र एक उद्योगले भने लामो समयदेखि विजुलीको बिल तिरेका छैनन। कारागार र सो उद्योगको विद्युत लाइन काट्न समेत प्राधिकरणले सकेको छैन।
जिल्ला कारगार कैलालीले ३३ लाख ७४ हजार ५६२ रुपैयाँ विद्युत महसुल बुझाएको छैन भने धनगढीमा रहेको मालिका अक्सिजन ग्यास उद्योगले २२ लाख ५७ हजार २६ रुपैयाँ विद्युत महसुल तिरेको छैन। समयमा विद्युत महसुल नतिर्ने जिल्ला कारागार र अक्सिन उत्पादन गर्ने मालिका उद्योगको गरी ५६ लाख ३१ हजार ५८८ रुपैयाँ विद्यूत बक्यौता छ। तर बक्यौताका लागि प्राधिकरणले ताकेता गर्दै आएको दाबी गरे पनि लाइन काट्ने आँट भने गर्न सकेको छैन।
उसो त चालु आर्थिक वर्षको हालसम्म एक हजार ९ सय ६२ ग्राहकको लाइन धनगढी विद्युत वितरण केन्द्रले काटेको छ। समयमा विद्युत महसुल नतिर्ने सो संख्यामा ग्राहकको लाइन काटिएपछि एक हजार ९ सय १८ ग्राहकले बक्यौता रकम तिरेपछि पुनः लाइन जोडिएको धनगढी विद्युत वितरण केन्द्रका सहायक कम्प्युटर अधिकृत जगदिश चन्दले बताए। ४४ ग्राहकको लाइन भने बक्यौता नतिरेकै कारण जोडिएको छैन। वितरण केन्द्रका सहायक कम्प्युटर अधिकृत चन्दका अनुसार विद्युत उपभोग गरेर ६० दिनसम्म पनि महसुल नबुझाउने ग्राहकको संख्या ५ सय ३१ रहेको छ।
