कैलाली । वरिष्ठ लोक देउडा गायक नरेन्द्रराज रेग्मी तेस्रो सुप इन्टरटेन्मेन्ट म्यूजिक अवार्ड २०८१ मा ‘लाइफ टाइम अचिभ्मेन्ट’ अवार्डबाट सम्मानित भएका छन् ।
सोमबार सुप इन्टरटेन्मेन्ट हाउस र बाडुल्की मिडिया हाउसद्वारा धनगढीमा आयोजित तेस्रो राष्ट्रिय सुप इन्टरटेन्मेन्ट म्युजिक अवार्ड–२०८१ को फाइनल अवार्ड कार्यक्रममा वरिष्ठ देउडा गायक तथा सर्जक नरेन्द्र राज रेग्मीलाई नगद ११ हजार १ सय ११ सहित लाइफ टाइम एचिभमेन्ट सम्मान प्रदान गरिएको हो ।
गायक रेग्मीका देउडा क्षेत्रकै कालजयी गीत, ढुकु रान्चडी, चैर मुसी चैर, गैजाउँ कि धनगढीतिर, लाईहेल कालो टिको, ढुकढुक्या रेल, सीता बनवास र सेतीले बगायो लगायत दर्जनौं गीत कुनै समय निकै लोकप्रिय थिए।
नेपालको मौलिक कला संस्कृतिलाई बचाइराख्न यस्ता खालका अर्वाड कार्यक्रमहरूको ठूलो भूमिका रहने भएतापनि एक्लो प्रयासबाट मात्रै यस्ता अवार्ड कार्यक्रम गर्न खर्चिलो हुने हुँदा मौलिक कला संस्कृतिको संरक्षण तथा प्रवद्र्धन गर्न राज्यले सहयोग गर्नुपर्ने सुप इन्टरटेन्मेन्ट हाउस प्रालिका अध्यक्ष अनुप चन्द ठकुरीले बताएका छन् ।
सोही अवसरमा भुवन दाहाल (दशक गायन सम्मान), संगिता शाह (दशक गायिका सम्मान), नर बहादुर शाह (निर्मल) (लाइभ देउडा सम्मान), दिपक उपाध्याय (समाजसेवी सम्मान), तिर्थ राज पन्त (युवा समाजसेवी सम्मान), भरत बिक्रम शाह (पर्यटन प्रर्बद्वन सम्मान), भुवन प्रकाश बडु र चन्द्र चौधरी (चाँद)लाई दशक कला सम्मानबाट सम्मानित गरिएको थियो ।
‘अग्रज लाई सम्मान, नयाँलाई प्रोत्साहन’ भन्ने मूल नाराकासाथ तेस्रो राष्ट्रिय सुप इन्टरटेन्मेन्ट म्युजिक अवार्ड–२०८१ को ग्राण्ड फिनाले धनगढीको द रेसिडेन्सी ईन बैभव प्यालेस एण्ड रिसोर्टमा सम्पन्न भएको हो ।
सुदूरपश्चिम प्रदेशका पूर्व मुख्यमन्त्री राजेन्द्रसिं रावलको प्रमुख आतिथ्यता रहेको उक्त कार्यक्रममा सुदूरपश्चिम प्रदेशका पूर्वमन्त्री रामेश्वर चोधरी, सुदूरपश्चिमका प्रदेश सभा सदस्य रक्षा महरा, सिवसिं वली लगायतको आतिथ्यता रहेको थियो ।
