कैलाली – धनगढी उपमहानगरपालिकाले आजदेखि हरेक शनिबार लाग्ने गरि शनिवारीय महिला उद्यम बजारको शुभारम्भ गरेको छ ।
धनगढी उपमहानगरपालिकाको पार्कमा उक्त बजार शनिबार दिउँसो १ बजेदेखि ६ बजेसम्म लाग्ने जनाइएको छ ।
आजदेखी शुरु भएको शनिवारीय महिला उद्यम बजारमा ६० ओटा स्टलहरु रहेका छन् । जसमा ३५ खाद्य र बाकी २५ स्टल बस्तु व्यवसाय रहेको उपमहानगरपालिकाले जानकारी दिएको छ ।
मेला आयोजना गर्नुको उद्देश्य बारे धनगढी उपमहानगरपालिकाका मेयर गोपाल हमालले नगर भित्रका उद्यमी महिलाहरुको सीप र उत्पादित बस्तुको बजारीकरणका लागि आफुहरु माध्यम रहेको बताए ।
मेलामा उद्यमी महिलाहरु जिविकोपार्जनका थुप्रै बस्तुहरु पाइने हुँदा सीप भएर पनि घरमा बस्दैआएका महिलाहरुका लागि लाभदायक रहने मेयर हमालले बताए ।
उपमहानगरपालिकाकी उपमेयर कन्दकला कुमारी रानाको प्रमुख आतिथ्यमा आजबाट शुरु भएको शनिवारीय महिला उद्यम बजारले उत्पादित बस्तुको बजारीकरणमा सहजता हुने उपमेयर रानाले बताइन् ।
