बैतडी–बैतडीको सुर्नया गाउँपालिका–५ स्थित प्रसिद्ध फाल्ङाशैनी भगवती मन्दिरमा जात्रा शुरु भएको छ । हरेक बर्ष कार्तिक शुक्ल चतुर्दशी र पूर्णिमाका दिन यो मन्दिरमा जात्रा लाग्ने गर्दछ ।
कार्तिक शुक्ल चतुर्दशीका दिन भगवतीको भण्डार घरबाट भण्डार ल्याएर जात्रा शुरु गर्ने परम्परा रही आएको मन्दिरका पूजारी विष्णुदत्त भट्टले बताए ।
यो जात्रामा सुर्नयाका साथै आसपासका पालिकाहरुबाट समेत दर्शनार्थीहरु पुग्ने गरेका छन् । यो मन्दिरमा राँगा र बोकाको बलिसहित जात्रा हुने गर्दछ । चतुर्दशीका दिन राँगा मन्दिरमा ल्याउने र पूर्णिमाका दिन बलि दिने चलन रही आएको छ ।
फाल्ङाशैनी भगवती मन्दिरको जात्रालाई स्थानीयहरु भवानी जात्रा भन्ने गरेका छन् । यो जात्रामा स्थानीय कृषि उपजहरुको विक्रिवितरण हुने गर्दछ ।
यस्तै आपसी भेटघाट, पारिवारिक र इष्टमित्रबीचको भेटघाटका रुपमा समेत यो जात्रालाई लिने गरिएको छ ।
