एजेन्सी – अमेरिकाका नवनिर्वाचित राष्ट्रपति डोनाल्ड ट्रम्पले एलन मस्कलाई ‘डिपार्टमेन्ट अफ गभर्मेन्ट इफिसिन्सी’ (डीओजीई) प्रमुख पदमा नियुक्त गरेका छन् । यो पद औपचारिक क्याबिनेट पद भने होइन । यसको उद्देश्य सरकारी खर्च कटौती र दक्षता सुधार गर्ने हो ।
राष्ट्रपतिको चुनावमा ट्रम्पलाई सघाएका मस्कले अब ट्रम्प नेतृत्वको सरकारी संयन्त्रलाई अधिक प्रभावकारी बनाउन सघाउने बीबीसीको खबरमा उल्लेख छ ।
मस्क नेतृत्वको ‘डिपार्टमेन्ट अफ गभर्मेन्ट इफिसिन्सी’ (डीओजीई)मा भारतीय मूलका विवेक राधास्वामीलाई पनि ट्रम्पले नियुक्त गरेका छन् । खर्च कटौतीका लागि ट्रम्प अनावश्यक सरकारी विभाग र एजेन्सीहरूलाई बन्द गर्नुपर्ने र अप्रासङ्गिक नियम कानून संशोधनको तयारीमा छन् ।
यसका लागि ट्रम्पले ‘सेभ अमेरिका’ नाम दिएर अभियान चलाउने बताएका छन् । ट्रम्पको यही अभियानलाई अब एलन मस्क र विवेक रामास्वामीले सघाउने खबरमा उल्लेख छ । यस्तै ट्रम्पले फक्स न्यूजका प्रस्तोता पिट हेग्सेथलाई आफ्नो प्रशासनको भावी रक्षामन्त्रीमा मनोनयन गरेका छन् ।
यसअघि ट्रम्पले हिजो फ्लोरिडाका सांसद माइक वाल्ट्जलाई राष्ट्रिय सुरक्षा सल्लाहकार र मार्को रुबियोलाई विदेशमन्त्रीमा नियुक्तिको घोषणा गरेका थिए ।
