धनगढी :सभामुख देवराज घिमिरेले बोलाएको प्रमुख सचेतकहरूको बैठक बिनानिष्कर्ष सकिएको छ ।
संसदको अवरोध खुलाउन सभामुख घिमिरेले प्रतिनिधिसभामा प्रतिनिधित्व गर्ने राजनीतिक दलका प्रमुख सचेतकहरूसँग छलफल गरेका हुन् ।
विपक्षी दलहरूले भिजिट भिसा प्रकरणको छानबिन गर्न उच्चस्तरीय समिति गठन गर्नुपर्ने माग राख्दै आएका छन् । बुधबारको बैठकमा सत्तापक्षले गृहमन्त्री रमेश लेखकले संसदमा जवाफ दिन पाउनुपर्ने अडान राखेका थिए । प्रतिपक्षीहरूले भिजिट भिसा प्रकरणमा छानबिन समिति बनाउनुपर्ने अडानमा थिए । दुवै पक्ष अडानमा टसमस नहँदा सहमति हुन नसकेको हो ।
सत्ता पक्ष समिति गठनको लागि तयार नभएकोले संसद बैठक अवरोध गर्ने रणनीतिमा विपक्षी दलहरू छन् । बुधबार १ बजेको लागि बोलाइएको बैठक सुरु हुन सकेको छैन । राजनीतिक दलहरूबीच सहमति नजुट्दा संसद बैठक बस्न अन्योल देखिएको छ ।
