डडेलधुरा । उग्रतारा–मेलौली सडकमा पर्ने खोलामा मोटरेबल पुल निर्माण नहुँदा आवतजावतमा समस्या हुने गरेको छ ।
सडक कालोपत्रे भए पनि खोलामा पुल बन्न नसक्दा बर्खायाममा आवतजावतमा समस्या भएको हो ।
यस सडकखण्डको बसानागाडमा पुल नहुँदा मोटरसाइकलमा क्षति हुने गरेको स्थानीय राम खत्रीले बताए । एक साताअघि खोला तर्दा मोटरसाइकल बग्नबाट जोगिएको र कागजपत्र भिजेको खत्रीले बताएका छन् ।
डडेलधुराको उग्रतारा मन्दिरदेखि बैतडीको तल्लो स्वराड क्षेत्र मेलौली भगवती मन्दिरसम्म जोड्ने उग्रतारा–मेलौली सडकखण्ड निर्माण सुरु भएको करिब चार दशक बितेको छ ।
अजयमेरु गाउँपालिकाका विभिन्न वडा जोड्दै तल्लो स्वराड पुग्ने सबैभन्दा छोटो दुरीको यो सडक लोकेन्द्रबहादुर चन्द प्रधानमन्त्री हुँदा २०४२ सालमा निर्माण सुरु भएको थियो ।
यतिका वर्ष बित्दा पनि जम्मा १८ किलोमिटर मात्रै कालोपत्रे भएको छ । खोलामा पुल नहुँदा निकै सास्ती हुने गरेको छ ।
अटोरिक्सा चलाउँदै आएका नवराज भट्टले गाडमा पुल नहुँदा निकै समस्या भएको बताए । पूर्वाधार विकास कार्यालयका प्रमुख नवराज रावलका अनुसार यस सडकलाई थप बजेट व्यवस्थापन गरेर बहुवर्षीय ठेक्कामा लैजाने योजना छ ।
अजयमेरु–२ का अध्यक्ष शिवराज भट्टले चालु आवमा बसना गाडमा पुल निर्माणको योजना अगाडि बढ्ने दाबी गरेका छन् ।
यस सडकखण्ड अन्तर्गत नौलाकोट गाडमा भने पुल बनेको छ । सुर्नया नदी र अन्य गाडमा भने पुल बन्न सकेको छैन ।
रातागौनदेखि ९६ किलोमिटर लामो दुरीको सडक निर्माण गर्ने कार्य जारी छ । उग्रतारा मन्दिरदेखि चमडासम्म सडक कालोपत्रे भइसकेको छ भने बैतडी खण्डमा पनि मेलौलीदेखि सुर्नया नदीको माथिसम्म कालोपत्रे भएको छ । गोरखापत्रबाट
