धनगढी। नेपाल विद्युत प्राधिकरण धनगढी वितरण केन्द्रले विद्युत सेवामा देखिने समस्या तत्काल समाधान गर्दै सेवा प्रवाहलाई थप चुस्तदुरुस्त बनाउन मर्मत तथा नो–लाइटसम्बन्धी कामलाई तीव्रता दिएको छ। वितरण केन्द्रका इन्जिनियर साजन सिंहको नेतृत्वमा प्राविधिक टोलीले विभिन्न स्थानमा देखिएका विद्युतसम्बन्धी समस्या पहिचान गरी आवश्यक मर्मत तथा सुधारका काम अघि बढाएको हो।
उनको टोलीले २०८२ साउन १९ गते मात्रै विद्युत सेवासँग सम्बन्धित विभिन्न महत्वपूर्ण काम सम्पन्न गरेको जनाएको छ। धनगढी–९ बाङ्ग्रा कटानमा रहेको १०० केभीए ट्रान्सफर्मर परिवर्तन गरिएको छ भने घरबत्ती तथा ग्राहकसम्बन्धी चारवटा गुनासोको समेत समाधान गरिएको छ।
भट्टी चोकमा रहेको २०० केभीए ट्रान्सफर्मरको न्यूट्रल केबल शुज परिवर्तन गरिएको छ। त्यस्तै, पञ्चोदय पश्चिमतर्फ ३०० केभीए ट्रान्सफर्मरबाट आउने लाइनमा तारहरू आपसमा ज्वाइन्ट भएको समस्या समाधान गर्न सेपरेटर राख्ने तथा केही स्थानमा बुश कटिङ गर्ने काम गरिएको वितरण केन्द्रले जनाएको छ।
यसैगरी, भन्सार र बेला फिडरमा चरा परी लाइन फल्ट भएपछि तत्काल प्राविधिक टोली परिचालन गरी चरा हटाएर विद्युत सेवा सञ्चालनमा ल्याइएको छ। मन्हेरा–७ मा एलटी लाइन ज्वाइन्ट भएर समस्या देखिएपछि आवश्यक स्थानमा सेपरेटर राख्ने कामसमेत सम्पन्न गरिएको छ।
विद्युत आपूर्तिमा देखिने समस्या छिटो पहिचान गरी तत्काल समाधान गर्ने, लाइन तथा ट्रान्सफर्मरको अवस्थालाई व्यवस्थित बनाउने र ग्राहकका गुनासोलाई प्राथमिकताका साथ सम्बोधन गर्ने काम भइरहेको वितरण केन्द्रले जनाएको छ। नियमित मर्मत तथा प्राविधिक सुधारले धनगढीको विद्युत सेवा थप भरपर्दो, सुरक्षित र व्यवस्थित बन्ने अपेक्षा गरिएको छ।
