धनगढी :कैलाली जिल्लाको धनगढी उपमहानगरपालिका–१२, जुगेडा ‘डी गाउँ’ मा ज्येष्ठ नागरिकप्रति सम्मान प्रकट गर्ने उद्देश्यले “ज्येष्ठ नागरिक निःशुल्क चिया घर” सञ्चालनमा ल्याइएको छ।
यस चिया घरमार्फत ज्येष्ठ नागरिकहरूले निःशुल्क चियासँगै आत्मीय वातावरणमा समय बिताउने अवसर पाउने भएका छन्। साथै, यहाँ पत्रपत्रिका तथा विभिन्न पुस्तकहरू पढ्न सकिने व्यवस्था मिलाइएको छ, जसले उनीहरूको ज्ञानवृद्धि र मानसिक स्फूर्ति बढाउने अपेक्षा गरिएको छ।
चिया घरलाई केवल चिया पिउने स्थानका रूपमा मात्र नभई अनुभव साटासाट गर्ने, पुराना सम्झनाहरू बाँड्ने र सामाजिक सम्बन्धलाई सुदृढ बनाउने साझा थलोका रूपमा विकास गर्ने लक्ष्य राखिएको छ।
यस कार्यक्रमका सञ्चालक तथा ‘द दरबार स्कुल’का संस्थापक अध्यक्ष पृथ्वी शाहले ज्येष्ठ नागरिकहरू समाजका अमूल्य धरोहर भएको उल्लेख गर्दै उनीहरूलाई सम्मानपूर्वक समय बिताउने वातावरण उपलब्ध गराउने उद्देश्यले यो पहल सुरु गरिएको बताउनुभयो। आगामी दिनमा यसलाई अझ प्रभावकारी बनाउँदै विस्तार गर्ने योजना रहेको समेत उनले जानकारी दिए।
