काठमाण्डौं –आज देशका सबै प्रदेशका धेरै ठाउँमा पानी पर्ने सम्भावना रहेको छ ।
गण्डकी प्रदेश, कर्णाली प्रदेश र सुदूरपश्चिम प्रदेशका पहाडी भूभागका एक/दुई ठाउँमा ठूलो पानी पर्ने अनुमान रहेको जल तथा मौसम पूर्वानुमान महाशाखाले जनाएको छ ।
यस्तै कर्णाली प्रदेश र सुदूरपश्चिम प्रदेशलगायत देशका पहाडी भूभागमा मेघगर्जन र चट्याङसहित हल्कादेखि मध्यम वर्षाको सम्भावना छ ।
महाशाखाका अनुसार कोशी प्रदेशको तराई भूभाग तथा मधेश प्रदेशका केही ठाउँमा हावाहुरी पनि चल्न सक्नेछ । दिउँसोभन्दा रातिको समयमा धेरै पानी पर्ने भएकाले सचेत रहन मौसमविद्ले आग्रह गरेका छन् ।
मौसमविद् विनोद पोख्रेलले देशभर मनसुन भित्रिएर दैनिकजसो पानी परिरहे पनि तराईका धेरै ठाउँमा राम्रोसँग वर्षा नभएको र खासगरी पूर्वी तराईमा लगभग सुक्खाकै अवस्था रहेको बताएका छन् । तराई मधेशमा अझै केही दिन पर्याप्त वर्षा नहुने उनको भनाइ छ ।
