काठमाण्डौँ : उपप्रधानमन्त्री तथा शहरी विकासमन्त्री प्रकाशमान सिंहले लोकतन्त्रविरुद्ध एक थरी मानिस भ्रम फिजाउन लागेको आरोप लगाएका छन्।
आइतबार ललितपुरमा दशौं धनबहादुर स्मृति अन्ताराष्ट्रिय अफिसियल कराँते प्रतियोगिता– २०८२ को उद्घाटन गर्दै उनले यस्तो आरोप लगाएका हुन्। उनले लोकतन्त्र तथा प्रजातन्त्र आएर मुलुकमा केही हुन नसकेको भाष्य निर्माण गर्दै एक थरी मानिसले नकारात्मक भ्रम फिजाइरहेको बताए।
उनले लोकतान्त्रिक प्रणाली हजारौँ नेपाली वीर सपूतको सङ्घर्षबाट प्राप्त गरेको जनअधिकार रहेको बताए। सिंहले लोकतान्त्रिक प्रणाली र जनअधिकारलाई संरक्षण गर्नुपर्नेमा जोड दिए। उनले जनअधिकारलाई सुरक्षित राख्दै देश विकासको काम अघि बढाउनुपर्ने जिकिर गरे।
सिंहले भने, ‘अहिले प्रजातन्त्र आएर के भयो? के पायौँ र? भनेर एक थरीले भ्रम फिजाउन लागिरहेका छन्। प्रजातान्त्रिक प्रणाली पुनर्बहाली गर्न हजारौँ नेपाली वीर सपूतको सङ्घर्षबाट प्राप्त गरेको जनअधिकार हो।’
उनले स्वर्गीय धनबहादुर महर्जनले जनअधिकारको गरेको सङ्घर्ष र खेलकुदको विकासका लागि गरेको कामको स्मरण गर्दै सम्मान व्यक्त गरे।
