काठमाण्डौं –विश्व पारा एथ्लेटिक्स ग्रान्ड प्रिक्समा सहभागी हुने ६ खेलाडीसहित १० सदस्यीय नेपाली टोली आज भारत जाँदैछन ।
दिउँसो १ बजे इन्डिगो एअरलाईन्समार्फत नेपाली टोली दिल्ली प्रस्थान गर्ने कार्यक्रम रहेको नेपाली टोलीसँगै जान लाग्नु भएका एथलेटिक्सका अध्यक्ष ओमनाथ सिवाकोटीले जानकारी दिए ।
आजदेखि यही मार्च १४ तारिख सम्म भारतमा हुने प्रतियोगितामा ५ पुरुष र १ महिला खेलाडीले नेपालबाट सहभागिता जनाउँदै छन ।
पुरुष ४ सय मिटर दौडमा नवराज कार्की र गोविन्द गिरी,सटपुटमा हिमाल अर्याल र फणिनारायण पौडेल तथा डिस्कस थ्रोमा राजु गुरुङले सहभागिता जनाउने छन् । गोविन्दले ज्याभ्लिन थ्रोमा पनि प्रतिस्पर्धा गर्नेछन् । प्रभा आङदेम्बेले महिला २ सय/४ सय मिटर दौड र लङजम्पमा भाग लिनेछिन् ।
अफिसियलमा राखेपकी सदस्य अञ्जना श्रेष्ठ र मुक्तिनाथ अधिकारी, व्यवस्थापकमा ओमनाथ सिवाकोटी तथा प्रशिक्षकमा विमला राना मगर छन् ।
