कैलाली –पश्चिम नेपालका तराई क्षेत्रमा थारू समुदायको माघी पर्वको चहलपहल शुरू भएको छ ।
आजदेखि कैलाली, कञ्चनपुरलगायत थारू बस्तीमा माघीको चहलपहल शुरू भएको हो ।
विशेषगरी पुस महिनाको अन्तिम दिनदेखि शुरू भई माघ २ गतेसम्म उल्लासपूर्वक मनाइने माघी पर्वमा पुसलाई बिदाइ गरी माघ १ गते अर्थात् नयाँ वर्षलाई स्वागत गर्दै थारू गाउँ बस्तीमा यो पर्व शुरू भएको थारू अगुवा प्रभातकुमार चौधरीले जानकारी दिए ।
आज बिहानैदेखि थारू गाउँहरूमा बङ्गुरको मासुका परिकार बनाउन शुरू भइसकेको थारू अगुवा चौधरीले बताए । त्यस्तै राति थारू जातिको संस्कृतिअनुसार नाचगान गरी रातभर जाग्राम बस्ने, ध्वनि जगाएर (धमार) भजनर्कीतन गर्ने, आगो ताप्ने, गञ्जी, तरूलजस्ता विभिन्न परिकार बनाएर खाने चलनसमेत रहेको उनले बताए ।
माघीको दोस्रो दिन भोलि माघे सङ्क्रान्तिका दिन विशेषगरी थारू समुदायमा बिहानै उठेर नजिकैको नदी तलाउमा गई नुवाइधुवाइ गर्ने र नुहाउने बेला नदीमा डुबुल्की लगाएर सिक्का पैसा छोड्ने गरिन्छ ।
त्यसपछि नुहाइसकेपछि धमार गाउँदै घरमा आएपछि घरका महिलाले छुट्याइएको चामल र मासको दाललाई छुने र ती छोएका चिज घरका छोरीबेटीलाई छुट्याउने प्रचलन छ ।
त्यसपछि घरमा भएका पूर्खा तथा आफूभन्दा ठूलाबडाबाट आर्शीवाद लिने परम्परा छ । तेस्रो दिन अर्थात् माघ २ गते पर्सि चामल र मासको दालको खिचडी खाने गरिन्छ ।
थारू समुदायको मुख्य पर्व भएकाले यतिबेला थारू गाउँबस्तीमा पर्वको रौनक छाएको गोदावरी नगरपालिका–८ फकलपुरका स्थानीयवासी माधव चौधरीले बताए । उनका अनुसार थारू समुदाय बसोबास गर्ने गाउँ, बस्ती अहिले माघीमय भएका छन् ।
थारू जातिको परम्परा, लोक संस्कृति झल्कने मघौटा नाच, लोक गीतसँगै डफ र मादलको आवाज पनि गाउँघरमा गुञ्जिन थालेको छ । यो पर्व थारू समुदायको नयाँ वर्ष भएकाले उनीहरूले वर्षभरिको गतिविधिको समीक्षा गर्छन् ।
माघी पर्वसँगै थारू समुदायमा विधिवत् रूपमा विवाह, अंशबण्डालगायत कार्यको थालनी हुन्छ । माघीको अवसरमा सुदूरपश्चिम प्रदेशले आज सार्वजनिक बिदा दिएको छ । यस्तै लुम्बिनि प्रदेशको दाङको घोराही उपमहानगरपालिका लगायत थारू बाहुल्यता रहेका अरू विभिन्न पालिकाले आज बिदा दिएका छन् ।
