बर्दिया – बर्दियामा चितुवाको आक्रमणबाट ६ जना घाइते भएका छन् ।
ठाकुरबाबा नगरपालिका–४ खैलार गाउँ नजिकै चितुवाको आक्रमणमा परेर झुती थारु, बिरु थारु, गणेश मल्ल, उमेश थापा, हरि लम्साल र अर्का एक जना घाइते भएका स्थानीयवासी विरु भण्डारीले जानकारी दिएका छन् ।
बबई नदी किनारको झाडी सफा गर्न जाँदा आज बिहान झुती थारुलाई चितुवाले आक्रमण गरेको थियो । उनलाई बचाउन जाँदा अरू तीन जनालाई पनि चितुवाले आक्रमण गरेको हो । त्यसपछि चितुवा नियन्त्रणमा लिन बर्दिया राष्ट्रिय निकुञ्जको टोली पुगेको थियो । त्यस बेला पनि चितुवाले थप दुई जनालाई आक्रमण गरेको हो ।
घाइतेहरूको ठाकुरबाबा नगर अस्पतालमा उपचार भइरहेको छ ।
