एजेन्सी :कम्बोडियाको एक अदालतले १३ जना गर्भवती फिलिपिनो महिलालाई सरोगेट आमाका रूपमा काम गरेको आरोपमा चार वर्षको जेल सजाय सुनाएको छ ।
यी १३ महिला सेप्टेम्बरमा कन्दाल प्रान्तका प्रहरीले पक्राउ गरेका २४ विदेशी महिलामध्ये थिए । उनीहरूलाई सीमापार मानव बेचबिखनको प्रयास गरेको अभियोग पनि लगाइएको छ ।
अदालतले पैसाको सट्टामा कुनै तेस्रो व्यक्तिलाई बेच्न बच्चा जन्माउने कामलाई मानव बेचबिखनसँग जोडेको छ । अदालतदे बच्चाहरू र उनीहरुको भविष्यबारे कुनै प्रतिक्रिया दिएको छैन । गर्भवती नभएका अन्य सात जना फिलिपिनो र चार जना भियतनामी महिलालाई कम्बोडियाबाट निर्वासित गरिएको खबरमा उल्लेख छ ।
सन् २०१६ मा कम्बोडियाले व्यावसायिक सरोगेसीमाथि अचानक प्रतिबन्ध लगाएको थियो । तर चीनले एक–बच्चा नीति खुकुलो पारेपछि व्यावसायिक सरोगेसीको माग अझै उच्च भएर कम्बोडियाका एजेन्सीहरूले यो सेवा दिइरहेका छन् ।
