काठमाडौं ।हालसम्म एक हजार ४२८ सरकारी कार्यालयमा विद्युतीय अथवा ई–हाजिरी प्रणाली सञ्चालनमा आएको छ ।
सञ्चार तथा सूचना प्रविधि मन्त्रालयअन्तर्गतको सूचना तथा प्रविधि विभागका अनुसार यी कार्यालयमा ई–हाजिरीका लागि एक हजार १९८ मेसिन प्रयोगमा ल्याइएको छ ।
यी कार्यालयका २४ हजार ६०७ कर्मचारीले ई–हाजिरी प्रयोग गरिरहेका छन् ।
विभागका अनुसार हालसम्म ३४५ सरकारी निकायले सरकारी क्लाउड अथवा जी–क्लाउडमा ८६९ मेसिन सञ्चालन गरेका छन् । क्लाउड भनेको सफ्टवेयर, एप जस्ता प्रणाली सञ्चालन गर्नसकिने भर्चुअल स्टोरेज हो ।
गएको आर्थिक वर्ष २०८०/०८१ मा विभागले ६४ वटा सरकारी निकायका ९० वटा वेबसाइट तथा एप्लिकेसनको सूचना प्रविधि प्रणाली सुरक्षा परिक्षण (भीएपीटी) गरेको जनाएको छ ।
विभागले हाल एकीकृत वेबसाइट व्यवस्थापन प्रणाली, एकीकृत कार्यालय व्यवस्थापन प्रणाली, सरकारी क्लाउड, केन्द्रीकृत ई–हाजिरी, केन्द्रीकृत एसएमएस गेटवे सञ्चालन एवं सरकारी निकायका डिजिटल पूर्वाधारको सुरक्षा अडिट गर्दै आएको छ ।
