कैलाली ।कैलालीको सुखड–भजनी सडकखण्डका लागि दुई चरणमा टेन्डर भएर सडक चौडा तथा कालोपत्रे गर्ने काम भइसकेको भए पनि बिच खण्डमा पर्ने चार किलोमिटर सडक अझै कालोपत्रे हुन सकेको छैन ।
पहिलो चरणमा भजनी नगरपालिकाको भजनी बजारदेखि सुखड खण्डको बिजुलियासम्म १० किलोमिटर सडक कालोपत्रेका लागि आर्थिक वर्ष २०७६र७७ बाट भजनीबाट निर्माण सुरु भई काम सकिइसकेको छ ।
त्यसै गरी दोस्रो चरणमा आव २०७८र७९ मा सुरु भएको घोडाघोडी नगरपालिका सुखडदेखि कीर्तिपुर जङ्गलसम्म सडक कालोपत्रे निर्माण कार्य पनि पूरा भइसकेको छ । तर कीर्तिपुर जङ्गलदेखि बिजुलिया गाउँसम्मको चार किलोमिटर सडकखण्ड हालसम्म कालोपत्रे हुन नसक्दा सो सडकमा यात्रा गर्ने यात्रुले सडक खाल्टाखुल्टीका कारण यात्रा सकस हुनुका साथै दुर्घटना हुने गरेको बताएका छन् ।
सो सडकखण्ड भएर सधैँ यात्रा गर्ने सुखडका पुष्पराज जैशीले भजनी क्षेत्र र सुखड क्षेत्रतर्फ कालोपत्रे हुने बिचमा सडक कालोपत्रे नहुनाले कच्ची सडकमा यात्रा गर्दा निक्कै दुःख हुने गरेको बताए । सुदूरपश्चिम प्रदेश भौतिक पूर्वधार विकास मन्त्रालयको सहयोगमा दुई चरणमा सडक स्तरोन्नतिसहित कालोपत्रे भएको जनाइएको छ ।
भजनी नगरपालिका–४ का वडाध्यक्ष जन्ताराम चौधरीले कालोपत्रे हुन नसकेको सडकमा वर्षायाममा वडाको बजेटले सामान्य ग्राभेल, खाल्टाखुल्टी भर्ने काम गरेको बताए । उनले कालोपत्रेका लागि प्रदेश सरकारसँग पटक पटक आग्रह गरेको समेत जनाए ।
कैलाली क्षेत्र नम्बर ३ बाट प्रतिनिधि सभा सदस्य गङ्गा चौधरीले कालोपत्रे हुन छुटेको सडक कालोपत्रेका लागि सङ्घीय सरकारले छ लाख रुपियाँ विनियोजन गरेको जानकारी दिँदै चालु आवमा कालोपत्रे हुने बताए । गाेरखापत्रबाट
