बाजुरा ।बाजुराको बुढीगङ्गा नगरपालिका–६ स्थित बाम्का बजारको फोहोर व्यवस्थापन कार्यमा निकै सकस भएको छ ।
बाम्का बजारका अधिकांश व्यापारीले बाम्कानजिकै रहेको पहिरोमा फोहोर फाल्न नछोडेपछि यहाँको बजार व्यवस्थापन समिति तथा स्थानीय सरकारलाई त्यो फोहोर व्यवस्थापन गर्न निकै सकस भएको हो ।
बाम्का बजारका व्यापारीलाई फोहोर फाल्न अन्य कुनै ठाउँ नभएपछि व्यापारीले प्रतिक्षालयनजिकको पहिरोमा फोहोर फाल्ने गरेको बाम्का बजारका व्यापारी रामचन्द्र गिरीले बताए ।
स्थानीय सरकारबाट फोहोर फाल्नका लागि कतै ठाउँको व्यवस्था नहुँदा फोहोर व्यवस्थापनमा समस्या भएको बाम्का बजार व्यवस्थापन समितिका अध्यक्ष दीपक साउँदले बताए ।
स्थानीय सरकारले बाम्का बजारको फोहोर व्यवस्थापन गर्नका लागि धेरै पटक बजार व्यवस्थापन समितिले परामर्श लिएको भए पनि यहाँका केही व्यापारी नमानेपछि त्यो कुरा सफल नभएको बुढीगङ्गा नगरपालिका–६ का वडाध्यक्ष हेमराज जोशीले बताए ।
